Pelita Batak "Sibalik Hunik " Episode 4 - BURUH TODAY

Post Top Ad

Your Ad Spot

Kamis, 14 Maret 2019

Pelita Batak "Sibalik Hunik " Episode 4



Salpu nalungun i di ingot si Vannesa di Telefon muse si Binsar. Patoranghon dohot mido anju di SMS natinongos ni anggina.

“Hallo...” nunnga marporo be soarani si Vannesa.

“Inum jo aek ngali i. Unang marporo ho. Nungga loja ho haroa natangis i?” ninna si Binsar.

“Ndang tangis ahu” ninna si Vannesa mangusi.

“Ido. Ndang tangis ho alai mangandung” gabe sundat modom si Binsar.

“Aha hian haroa?” ninna si Binsar manungkun.

“Ndang Adong. Unang pola pamasuk tu roham hatani anggiki dah!!! Ndang songoni sasintong na” ninna si Vannesa jolo dibonduti tijur barina na,  simalolongna pe manghirdop hirdop manolpol ilu nanaing haruar.

“Tangis maho. Unang huntam. Asa puas arsakmi. Unang maila ho tangis” ninna si Binsar. Tingki rap nasida di Manando jotjot do di jujui si Binsar asa tangis si Vannesa unang di huntam lam hansit dihilala. Molo ndung tangis sai sijaga jaga si Binsar mai.

“Ndang tangis ahu” ninna si Vannesa. Iluna nungga maneteki. Ndang tarsompolna be.

“Asa puas do arsakmi dodong. Unang sai huntam molo porlu andungkon. Asa lumbang panghilalanmu”

“Ndang tangis ahu ningku” sosonbopon si Vannesa lam tanda naung marsilongi tangisna. Lam habeagan natangis imana.

“Tangis ma ho. Hu paima pe sampe lumumbang panghilalaanmu” ninna si Binsar. Tangis ma tutu si Vannesa. Dipapuas arsak ni rohanai marhite andung dohot ilu. Alani andung naima gabe tarsunggul anggina. Laos ngot. Dipeakhon songoni handphone i dijolona.

“Mahua ho kak” ninna Anggina huhut dipulos simalolona.

Hohom do si Vannesa ndang di alus. iluna do sai maraburan. Di ida anggina handphone i na terhubung dope tu bariba tao.

“Nungga las he roham tangis kakakki? Bagudung?” diburai si Binsar. “Ido antong pangidoanmu. Ido napinarsintam asa sega rumah tanggani kakakki”

“Dek, unang burai jolma naso sala. Ndang alani non i. Unang marasapu sapu tusi” ninna si Vannesa tu anggina.“Di ingot kakak do na nidok ni abang i? Si Binsar namabaor on do manegai ho jumolo” sulpak hatani angginai mangalusi.

“Ndang tohoi dek!!” ninna si Vannesa huhut do tangis.

“Ehe, molo kakak mu doi. Ingkon sulingkitanmu do aha namasa, ndang pintor tuduonmu ahu sipanegai. Unang pintor hatop ho manudu ahu. Jolo sulingkiti jo Abang mi. Molo  baoa malo do marparange nandengan manabunihon rorang na. Diboto hodo? Unang holanna manudu malo” ninna si Binsar mangalusi. Nungga nangkok otik soarana.

Gabe mabiar anggini si Vannesa manghatai. Nanget nama dipeakhon imana handphone i muse dijoloni kakakna. Dihaol kakak nai laos dohot imana tangis. Rap tangis masida nadua dimonongot i manomu mataniari binsar.

“Laok nai hamu nadua tangis” ninna si Binsar. Hape soada na mambege, ai peak do handphone i. Nungga laos mago haroa soarani si Vannesa laos dipamate handphone i. Ndang piga dan ditelefon si Binsar muse. Disungka sungka si Vannesa manghatai tungpe sipata mullop soarana, sipata lonong.

“Modom majo ho. Papungu gogo laho manghilala mohom ni ari sadarion. Modom ma ho. Pasahat tabeku tu anggimi” ninna si Binsar paujunghon panghataion nisada manogot i.

Sabotulna ndang nalaho modom si Binsar naso tarpabege-begena be andungni si Vannesa I dohot muse Angina tumatangis.
“Boasa songoni ateh??? Toho do naung sirang nasida? Alani aha ma ulaning i?”
marhusori pingkiran ni si Binsar. Dihilala lungun ni rohana natinaon ni si Vannesa.

“Boasa didok alani ahu? Aha nasalah hu baen!! Boasa marsapu sapu sahat tu ahu. Na aha do salanghu” ndang ra sirnom simalolong ni si Binsar. Marmuniki do rohana dibagasan. Gok sungkun-sungkun.

“Nandingan nasida sirang? Di dia nuaeng amanta nai?” sura jonok Medan tu Manado ingkon do duloon ni si Binsar asa dipatangkas sude, dipatumpol. Unang gabe sahit I dohot lungun I di bagas rohana. Laho borhat tu inganan karejo mardongan losok ni roha si Binsar sai ganggu rohana holan alani I. gabe laos mago hagiot ni si Binsar naing modom.

***

Disorohon si Binsar manelefon si Vannesa ndung mulak sian karejo. Naing ma patangkasonna saluhut namasa. Loas tingki ima di paboa si Vannesa naung songoni partinaonan na, dipaboa naung di paulak imana tu jabuni Inong na, naung mangoli muse paribanna nai. Naung sursar rumah tanggana.

“Jei, boasa marsapu sapu-sapu tu ahu??” disungkun si Binsar. “Boasa songoni hatani Anggimi tu ahu? Boasa ahu dipalea-lea?”

“Anggikki do nasala, ndang ho. Sehat do ho Binsar?” disorohon si Vannesa manungkun baritani ale-ale nai.

“Sehat do ahu, boasa marsapu-sapu tu ahu?” disungkun si Binsar muse.

“Ima namaol hu patorang tu anggikku, Sar. Toe muse tingki I, dijoloni anggikku di dok naho parjolo mangaborngini ahu, na ho parjolo mangarapu pamatanghu…”

“Didok amanta mi tuho songoni di joloni Anggim?” soluk hatani si Binsar mamonggol hatorangan na ditariashon ni si Vannesa.

“Ido.” Tarbege naung marlinging tangis ni si Vannesa.

“Nungga piga taon hamu na marsirang i?” ninna si Binsar muse manungkun.

“Nungg adong dua taon. Holan sabulan do hami rap modom, ndungi holan bada nama, jala pintor dao do parpodomanna. Intor so mulak tu jabu” lam tangkas do tangis ni si Vannesa. “Nungga be I akh!!! Unang sungguli be i..!!” marpangidoan si Vannesa.

“Jei boasa sai hu telefoni ho ndang hea maralus?”

“Maila ahu. Ndang huboto aha sidohononhu” ninna si Vannesa mangalusi.

“Oh. Toe ma molo songoni. Nungga majo i. ateh. Ahu pe gabe sotabodo huhilala gabe marsapu-sapu tu ahu” ninna si Binsar.

“Unang muruk ho!!! Ndang ho nasala!!” ninna si Vannesa.

“Olo. Nungga majo” ninna si Binsar.

Marholang saminggu ndung sae nasida martelefon pintor borhat do si Binsar tu Jakarta di pangido cuti dua minggu. Ingkon dapothonon na do amanta ni si Vannesa nahinan. Ingkon dipatumpol aha namasa. Jala ingkon tedek bahenonna songon indahan di bagas tandok. Holan papan nama do bohal ni si Binsar mandiori, papan nama ni baoa haluang i. holan I hian do dilean tu si Binsar ndung hea marpiga hali nasida jumpa di Manado tingki manandangi si Vannesa. Tolu ari tingkina mandiori alamat na tarsurat di papan nama i. jala pintor dapotna do paribanni si Vannesa I haruar sian perusahaan na balga. Pakke jas dohot maniop harotas. Ndang pintor didapothon si Binsar, jolo di parsiaajari do angka nahumaliang. Diparsiajari parangeni si baoa haluang i. di ari papituhon di tongoshon si Binsar nomor booking tiket pesawat tu handphone ni si Vannesa laos gomos ditonahon asa ro tu Jakarta.

“Ingkon ro do ho. Ima nomor booking ni tiketmu. Hu paima di Jakarta.”

“Marhua dope ahu tusi?? Patubu hansit ni rohana na ma molo hubege Jakarta”

“Pokokna ingkon ro, naing do ias goarhu di joloni Anggim. ra, nungga sahat tu huta muna na roa goarhu. Urupi ahu”

“Nungga losok rohangku tusi, ndang tarbereng ahu annon manang aha pe namasa. Lokma disi hu jalo soroni aringku” ninna si Vannesa mambalos SMS i.

“Unang baen rotak goarhu. Ai holan goar ido arta di ahu. Molo ndung rotak goarhi aha be na hujambari?? Alani ro ma ho” mansai gomos marpangidoan si Binsar.


Ndung sahat di Jakarta jumpa di hotel ma nasida, di hotel inganan ni si Binsar mainsolat. Holan sadari do mangulon, ndungkon i pintor borhat do nasida mandiori amanta na nahinan. Ndang tu jabu be di dapothon tu inganan parkarejoanna na ma. Jolo parmisi do denggan si Binsar tu panjagani perusahaan i.

“ Ini hubungan binsis” ninna si Binsar.

Di lantai opat do si baoa haluang I karejo disi do biluk na, di biluk ipe adong sampulu halak parkarejo. Ndung sahat tu biluk i. sonanggo age dia dope ndung jonok si Binsar pintor di taos do pamangan ni baoa i. Disarat sian karosina.

“Bodat!!!!! Ndang diboto ho burju ni sahalak jolma” ninna si Binsar. Dipanghaishon si Binsar angka tangan na manjorat imana.

“ Dimana meja Manajermu??” disungkun si Binsar nungga tung jembur rimas na.
songon patung gana-gana do si Vannesa marnida. Asini roha nungga mago be sian parngoluonna.  Ndang sae disi, intor di diori si Binsar do Manajer di perusahaan I. adong do panjaga ni perusahaan I manjorat tangan ni si Binsar hape laos di longgi si Binsar mai, di pusa “ Jangan halangi aku!!! Paham?” ninna si Binsar ndung galpang panjaga i. di lantai onom inganan ni Manajer I diadu si Binsar do tusi.

“Maaf, pak, saya sudah membuat kekacauan di perusahaan ini. Sekali lagi saya minta maaf, dan tolong yang bernama ini bapak izinkan sebentar keluar untuk menghadap ke kantor polisi” dipaboa si Binsar goarni si tapus i.

“Ada masalah apa? Dan anda siapa”

“Masalahnya sudah banyak dan saya sebagai korban tidak memberikan ampun lagi, ini tentang moral dan kemanusiaan.”

“Silahkan”


Ndang godang hata sian manajer I, pintor bagas do di pingkiri unang alani salahak Guntur sahuta, laos hohar sada perusahaan. Diloas ma diboan karyawan na i. unang laos bada bolak.

“Tolong telefon polisi pak” marpangidoan dope si Binsar tu panjaga naung tinumbuk nai.

“Ia. Iya , pak.” Sigop amanta I manelefon.

Pintor tu kantor polisi do dibaon si Binsar antong. Ndang dibaen imana be asi ni roha. Ala na marsapu-sapu goarna di parsirang ni rumah tangga ni si Vannesa. Ido mambaen ndang adong be asi ni roha. Di kantor polisi ma di introgasi laos disungkuni sude.

Jago do mamorso si tapus I, malo marganjang dila. Ndungpe dilean si Vannesa salinan sian komputer nai asa mogap si doli sirabun i. haro polisi ipe mangupir mida isini flasdisk nanileanni si Vannesa.

Dilaporhon si Binsar jalo. Dibaen pencemaran nama baik
Pintor diparhatutu baoa sitapus ima sude pangalahona. Laos di patumpol tusi Vannesa.

“Unang massam massam ho tu ahu!!!” ninna si Binsar diharat ngadolna.

“Karena masih terikat hukum adat, boleh kami bawa di ke kampung, pak?” disungkun si Binsar tu polisi.

“Itu butuh biaya” ninna polisi mangalusi.
“Masalah biaya, saya siap pak” ninna si Binsar.

“kita bawa.” Ninna polisi I mangalusi. “lalu bagimana dengan proses hukum pencemaran nama baik yang bapak laporkan??” disungkun polisi I tu si Binsar.

“Proses setelah selesai masalah dari kampung, pak”

Ndang paima ari be holan paima tingki nama, pintor hatop do di parade si Binsar tiket ni na opat halak jala laos sadari ido borhat.

“Boasa ingkon sampe songoni bahenonmu?” ninna si Vannesa manungkun.

“Ingkon songoni do pailahon bayon” ditudu domak si doli parillik i. “ ra dihuta pe nungga di babani deba hamu. Nungga hu sura I. alani I ra, dang marsiantoan be na mar-Eda” ninna si Binsar.

Sahat manogot ma halak si Binsar di lumban pinasa. Pintor tu jabuni baoa si tapus ido diboan.

“Aha namasa? Ro polisi? Na manangko hepeng ni pamarenta do? Alai boasa dohot inanta na nahinan?” gok sungkun sungkun dirohani angka parhuta i. ai pintor ronggom do sahuta. Ro nang hombar jabu.

“Jou jo nantulang hamu!!” ninna si Binsar dompak si Vannesa.

Molo Inong ni sibaodi dohot Among na nungga sai maoto hundul pellet ndang margea. Naing manungkun  maol ungkap pamanganna, alai pamereng na dompak si Vannesa mansai tajom. Ndang adong antong nabarani parhuta I manungkun aha namasa, polisi nabinoan ni nasida pe mansai tajom do dibaen pamereng na. so jolo marboa boa sidoli sitapus I tu inanta na. ai soholan I tahe inanta na songon na binereng ni si Binsar gok do borua dilambungna.

Ditingki mardalan si Vannesa naing manjou inong na disangahon parhuta ido manungkun taringot aha namasa “ Ahu pe dang huboto” ido di dok si Vannesa alusna.

“Tung laos ripas ahu, ndang laho dalanhu jabuni” ninna Inong ni si Vannesa biraraon.

 “Tumingkos mardomu ditano rara” huhut muse ma marsitijur Inong ni si Vannesa mangalusi. Mulak balging ma si Vannesa.

“Pak, ke kepala desa ajah kita bawa” ninna si Binsar tu polisi nabinoanna.

“saya hanya keamanan pak. Melindungi nyawa pelaku” ninna polisi mangalusi.

“Ai…tung aha do na masaa ompuNggg eeee…!!!” mansai gogo soarani Inong baoai mangandung, lam ronggom sahuta i. adong manilik sian janjela, sian pintu sian holang holang ni dorpi na ranggang.

“Anakmon. anak si takkal tabu. Anak siboan bada” ninna si Binsar mangalusi.

“Boasa dohot borua sirimbur rara an?? Borua narorang on??” diandunghon dibereng dompak si Vannesa.

“Anakmon do hoda jalang, hoda nasoumboto sigagatonna” ninna si Binsar.

“ Didok anakmon alani ahu sega rumah tanggana” ditudu si Binsar dirina mandok 'alani ahu' ima anakmon.

 “Didok hata naso suman tu boru ni naung mabalu. Tu boru ni tondongmu hape anakmon do naso marmukmus” gogo soarani si Binsar.

“Boruaon do naso suman, marroha roha muse tu baoa”

“Tu baoa dia??” ninna si Binsar. “paboa tu ahu. Ise baoana i??” dialo si Binsar torus nungga mohop ate atena.  Bulus na ma sai songon Ina-ina si Binsar.

“Ise parsinabung tingki pesta ni halakon dohot si jalo tintin marangkup ingkon hu joi do sadari on, ingkon parsiboto da nasida” ninna si Binsar.

“Ompu  Linggom do tingki I parsinabung, ompung Tolopan sijalo tintin marangkup” songon soarani borong borong hatani natorop i.

“Di dia do jabuna? Angka Amang dohot hamu inang?” ninna si Binsar manungkun.

“Disan. diharbangan ni gareja. Molo ompung ni Tolopan di Bahal batu”

“Mangido pangurupion majo ahu tu hamu Amang dohot tu hamu Inang asa gora hamu majo tuson!!!” somba hatani si Binsar.

“Dakdanak ima suru hamu asa lengkat marlojong” ninna sahak ina na maningkir sian janjela.

So mutap Among ni sibaoadi. Hohom do hundul nungga mansai maila situtu imana rodi do muse umbahen raja adat sian boru imana ndang pintor boi hatop pasimpulhon dohot manongai. Ingkon diorom do hatana.

Sai holan parsonduk bolonna ma humateptep mangalusi dohot mangandungi, mangadopi namasa i.

Hombar sahuta pe laos ronggom tu alamanni jabu I ndung sahat parsinabung dohot sijalo tintin marangkup ulaon pesta unjuk ni si Vannesa. Marlojong sada Ama-ama mangadu si Binsar.

 “bah!! Ai ho do i. aha namasa songon na rara bohim??” ninna manungkun si Binsar. Ama-ama dongan ni si Binsar minum kopi dua taon naung salpu.

“Ai nungga sirang si Panisa I bea!!” dihusiphon Ama- ama.

“Ido nuaeng nasala Tulang, ahu di dok amanta nai sipanggugai ni rumah tanggana”
“Boha nimmu???” sian na marhusip gabe tompu gogo soarani Amanta I.

“Anonma hita manghatai” ninna si Binsar. Alai ndang olo morot amantai sian lambung ni si Binsar.

“Bulus ma di alaman hita manghatai” ninna Ompu Linggom, gogo soarana. Songon na war dihilala hatuaonna ndung dibege angka hata hata sian natorop i.

Pintor sigop sisolhot ni si Vannesa pabolak tingkar panjomuran ni eme, laos disima hundul.

“Barita aha do haroa nabinoanmu adonang” tajom pamereng ni Ompung Linggom, dompak si Binsar. Ndung rap nahundul sude angka raja adat ni huta I, ai gabe di eta Ompu Tolopan angka raja adat.

”Mauliate, di damang. Naung rade mangalean tingki dohot roha mangadopi namasa on” ninna si Binsar “ Purma alu alu sahat ma barita tu sipareonhu. Na ahu didok manegai rumah tanggani itoan” ditudu si Binsar dompak si Vannesa. “Songon ahu ale ale ni ito an ndang tarjalo ahu i. jala ndang hea hami marroha roha manang marsitekka dipudi ni jolma. Palias ma i.” nungga dibereng si Binsar na unduk bohini si Vannesa, nungga tangis be si Vannes diida.

“Hape dia ma ?? baoa an do!! Baoa an!! Mamungka bada dohot porang dibagasan rumah tangga ni nasida imana do marroha roha dohot borua na asing. Ndang si Vannesa manimbil sian padan naung pinudunna di joro ni Tuhan I” tonggor simalolong ni Binsar.

 “Ido kan, Lae?? Alusi ahu!!” ninna si Binsar. Alai, baoa I sai lalap do unduk ndang maralus.

“ jawab aku Lae. Lae yang menghancurkan rumah tangga lae kan?” marhata Indonesia si Binsar asa diboto polisi nabinoanna I aha na sinungkunna. Alai sai hohom tutu pintor di goit polisi na di lambung nai do.

 “Ido lae” ninna ma mangalusi si Binsar.

“Buriapus!!! Sambor ma nipi nibegu. Sintak mai homang” pintor gok hata bura sian jolma natorop I nadohot manangihon di tonga ni alaman.

“Iala, rupam soi nama. Parangem sosuman” ninna nasada.

“Parjehe do hape” ninna muse.

“Antong hamu ma manghatai dison asa lao hami” ninna Ompu Tolopan. Ai gabe jolma ido sidok hatana be.

“Beta tu balian ma hita ndang sitangihonon songonon” ninna salak ina, huhut hinsat alai, ndang ra morot. Disangahon inanta I dope tahe mangalusi hatani Ompu Tolopan i.
“Songon dia ma haroa napinangidom anaha?? Alana nungga dua taon nabagas halakon padao dao, jala muse sibaoadi nungga mangalap boru muse” ninnna Ompung Linggom.

“Dirohanghu Amang, asa ias ma goarhu sian parsirangan ni nasida, unang marsapu sapu tu ahu. Jala ahu pe denggan mula ulaon. Songon dia ma adat namasa di huta on songoni ma ihuttononhu. Asa ias goarhu” ninna si Binsar. Marudut - Bersambung.


Penulis : Erikson simarmata.

Tidak ada komentar:

Posting Komentar

Post Top Ad

Your Ad Spot