Pelangi Batak " sibalik Hunik " Episode 2 - BURUH TODAY

Breaking

BURUH TODAY

www.buruhtoday.com


Post Top Ad

Selasa, 12 Maret 2019

Pelangi Batak " sibalik Hunik " Episode 2



Songoni burju si Binsar tu Imana. Songoni denggan didongani. Sian na kulia rodi ndung rap karejo tontong do ndang muba pangalahoni si Binsar tu si Vannesa. Sai sungkun sungkun do rohani si Vannesa dihaburjuon ni si Binsar, diharadeon ni roha manomu lungun dohot las ni roha. Tardok lima taon ma mabuat Sarjana so marsamban ari i dinasida lalap do haburjuon i dipatudu si Binsar. Ongkos na tingki mulak tu huta dohot ole ole so adong di sunggguli si Binsar i tu imana. Gariada tahe di tongos dope otik nae tingki i tu  rekening ni si Vannesa hepeng, atik dia adong na hurang lobi dipartuat ni Among nai.

Holong ni roha soadong ruar sian pamangan ni si Binsar. Parangena pe so muba. So adong parange na lobi na boi patandahon holong ni roha.  Di uji si Vannesa do nian manghatai taringot holong alai holan sangkababa do alus ni si Binsar.

“Ndang na ingkon holong roha mida jolma asa burju iba. Naburju do iba asa holong rohani jolma”

Hape pariban ni si Vannesa nungga sai tarpaima dialus ni holong naung pinasahat na.  Nungga ro marpiga hali tu jabu painsolatan ni si Vannesa. Songoni jeges ni pariban nai. So talu dohot di roha rodi di arta. Alai sai bangkol do rohani si Vannesa mangunduk holong ni pariban nai. Jala di angkui si Vannesa do dirohana na holong rohana mida pariban nai. Molo ndung jumpa pariban nai dohot si Binsar di jabu painsolatan ni si Vannesa, dengan-dengan do si Binsar manghatai ndang adong mangiburu diida sian panghataion na. Gariada di jujui si Binsar do asa lao si Vannesa mardalani dohot pariban nai. Molo di jua si Vannesa laho mardalani dohot pariban na pintor si Binsar do jumolo mambolong “Ai tung lai..!!” songoni do hatani si Binsar.

Hansit do na tarpaima : Ia molo ho do lao manandinghon. Ingkon ho do mulak mandapothon. Unang be borhat muse manundalhon. Unang tarpaima di panggullus ni alogo sampuran.

 Maos do hatai di pahusor husor si Vannesa di bagas rohana. Hata natinangina sian si Binsar. Aha do lapatanna. Lobi do muse hatani si Binsar ditingki potang ari : Ia tung binsar pe mataniari laho manondangi roha angka naholom do ndang na holan manondangi portibion.  Dibahen i, palambas ma roham manjalo saluhut namasa dingolum.

Angka poda nartur do dapot ni si Vannesa sian si Binsar. Suman tu goarnai angka hata nauli do Binsara sian pamanganna rodi pangalahona.

“Olo nama mulak ahu dohot paribanhu. Ndang puluk rohanghu mangaunghon holong na. Sai songon gaung ndang marsangkotan hundul ndang marondolan. Asing ni muse holong do rohanghu mida imana” ninna si Vannesa di sada tingki. Topet nasida mangan borngin di lapo ni halak hita.

“Nauli mai. Molo ido dalan si dalananmu. Atik dia tartuktuk laos so boi mardalan ingot ma boi dope juluranmu” ido alus ni si Binsar.

Mambege alus i. Gale do dihilala si Vannesa “Boasa songoni alusna? Naso holong do rohana tu ahu? Aha do lapatanni burjuna saleleng on?” porhot di Bondut si Vannesa indahan i.

“Boasa sai surduk tanganmu manogo ahu? Sai rade abaram ingananni arsakhu? Dipatupa ho tingkim tu ahu?” dibarani si Vannesa manungkun.

“Hu ingot dope burju mi. Ole-ole dohot ongkoshu mulak na taon na salpu sahat tu tingki on ndang ditarsingoti ho i. Utang doi di ahu!!” sude dilpatolhas si Vannesa.

“Adong nasib mu tingki i. Boi i rade. ndada alani ahu. Alani Tuhan i doi.  Sian dongan pe diparade Tuhan ido pasupasu” ninna si Binsar mangalusi, dapot rohana do alani aha songoni si Vannesa manghatai.

 “ Ia molo tung rade pe tanganhu dohot abaranghu. Na ima ra lapatani dongan. Dongan martungkar pingkiran”

“Ndang na holong roham tu ahu asing sian dongan nasomal?” manubuk rohan si Vannesa.

“Daong” holan i sambing do alus ni si Binsar.

“Aha do kadom molo Muli ahu?”

“Molo tuk gogoku aha pe dijalo ho rade mai. Ipe molo tuk” ninna si Binsar.

***

Nungga patar be songon indahan di balanga. Ndang adong na asing dirohani si Binsar umbahen burju tu si Vannesa.

Songoni dao Jakarta tu Manado. Sai disorohon pariban ni si Vannesa do ro mandulo. Jala modom dijabuni si Binsar do somalna. Rade do rohani si Binsar manjalo jala ndang adong di imana marbuni buni. Gariada tahe sai sanggap do dibaen paribanni si Vannesa i. Manogot diparade do kopi,. Motor na ditadinghon do. Mar bus do si Binsar lao karejo. Atik dia mardalani paribanni  si Vannesa i nungga rade motor ni si Binsar dalan dalanna.

On ma borngin naparpudi di si Vannesa dohot si Binsar. Sogot di hosni ari borhat nama si Vannesa dohot paribanna tu Huta laho manjalo pamasu masuon. Jala ndung sae pesta unjuk tading di Jakarta nama nasida.

“Ma...mauliiiate di ho...”

“Hekhg..hekhg. unang tangis ho” ninna si Binsar di biluk nai. Ai tu biluk nai nama di dapothon si Vannesa laho parmisi.

“Tiur ma langkam. Unang sai mandia roham dah. Sae nalungun roma natiur. On mai di ari pamasu-masu on mu, ingkon marlas roha doho” gomos marpangidoan si Binsar ditiop do tanggan ni si Vannesa.

“Di dia pariban mi jou tu son” ninna si Binsar.

“Manuhor sigaret tongkin” ninna si Vannesa. So tarnong-nong be ilu na disimalolong nai.

“Antong tu emper an ma hita” ninna si Binsar ditogihon mardalan.

Di emper ima nasida manghatai rap dohot paribanni si Vannesa i.  Disi ma martading hata si Vannesa.

“Mauliate di Lae” ninna paribanni si Vannesa i dompak si Binsar.

“Akh!! Lae on!! Toe ma tu Tuhan ima tadok Mauliate. Disiala basa basa dohot sangkap muna. Tuhan ma na patulushon” ninna si Binsar mangalusi.

Morot si Vannesa borat langkana. Lao imana tu biluk ni si Binsar. Dipodoman naung talmak di biluk i tompas ma pamatang na alani lungun ni roha. Mansai lungkun di hilala manadinghon ale ale nai. Marsap ilu Bantal i dibaen si Vannesa. Holan sada gambar do gaung di biluk ni si Binsar gambar sakeluarga, di fhoto i tangkas do tarida engkel ni si Binsar mangabing dakdanak topet di tonga tonga.

“Tarhona modom.  Nungga tonga borngin” ninna si Binsar ndung di ida peak si Vannesa di Podoman i. “Dungo ho nungga tarpima lae an”

Nungga naing dihaol si Vannesa si Binsar alani lungunna. Naing di umma hurum na. Naing di ampehon simajujung nai tu andora ni si Binsar. Naing..naing...

Diontom si Vannesa mai sude ndang laos bahenonna songoni dijolo ni paribanna sotung gabe mandia rohani paribanna i.

“Toe ma. Horas be ma hita” huhut di dada si Binsar tonga borngin i. Ima borngin naparpudi.

***

JAKARTA HUTA NAULI

Andorang so mulak tu Bonapasogit disangahon halak si Vannesa dope tu Monas mardalan-dalan marfhoto-fhoto nasida disi, songon paherbang holong ni nasida, pasada sihol naung leleng mian di hajang hajang.

Uli nasida marfhoto. Dihaol do momos si Vannesa tingki na marfhoto i. Adong sada fhotoni nasida marsiampean hurum.

“Namaolan ho mangunduk holonghu” ninna tu si Vannesa.

“Ala na dao i doi. Atik dia adong muse si boru na asing diroham. Ndang sai binoto i” ninna si Vannesa.

“Akh!! Ho nian. Nungga  hudapothon ho tu Manado, alani holong mai”

Sonang so haribo-ribon si Vannesa dohot paribanna i. Marsada holong, nalaho pudunonni nasida nama di joro ni Tuhan pangaranna dohot patik. Sian adat na gok dohot tangiang ni situan natorop.

Borhat tu Bonapasogit, lalap na hurang gira sahat.  Jolo boluson ni nasida do jabuni si Vannesa asa sahat tu jabuni paribanna i.  Pukkul dua manogot ma nasida sahat.

Ditogu sian harbangan ni huta i diring iring sian alaman sahat tu jabu ndungi dipahundul nasida tu halang ulu, dijomput namborunai boras pir dibaen tu simajunung ni anak na dohot parumaenna. Di pirpirhon tolu hali tu ginjang huhut di dok Horas tolu hali.  Songoni nang Amang boruna. Dohot sisolhot. Torop jolma di jabu i. Torop si solhot manjalang, dohot hombar jabu.

Dimata ni ulaon pe jumpa si Vannesa dohot Inongna, anggina. Jolo martangiang do dijabu asa tu gareja. Mansai uli do si Vannesa mamangke kabaya i, songoni nang parhalang uluna mansai jeges namar-Jas i.

Tep laho manjalang natua tua marabur iluni si Vannesa manjalang inong na dohot Anggina.

“Inonghu. Sura dison bapa” ninna huhut tangis.

Diapus inong ni si Vannesa iluni borunai. Diapoi rohana, unang be tangis.
Digareja mansai torop jolma mangihuthon partording ni ulaon pamasu masuon i. Lalap do maraburan iluni si Vannesa mangendhon ende SAI TIUR MA LANGKA MUNA.  Songoni nang Inong ni si Vannesa marabur do iluna mida boru nai, rodi anggina tahe laos mangangguk. Lam madurus ma ilu ni Inong na ai tompu di bereng haliluni Among ni si Vannesa.

“Nungga muli borunta” ninna Inong ni si Vannesa humitir pamanganna.

Torop angka panjalang nungga sampe dua hali endei mulak ulak. Lalap dope marjojor angka jolma laho manjalang.
Mansai songot rohani si Vannesa dilap iluna namarabur i. Di ida si Binsar na menghel suping jongjong dipudini  angka situan natorop, martahuluk dope imana manghadang tas.

Dipasuman si Binsar songon na mangapus ilu huhut ditudu dompak si Vannesa. Diulahon si Vannesa napinasuman ni si Binsar i. Di apus iluna muse. Diapus, diapus lalap do maneteki.

“Tarlan ahu. Ndang boi sigop hu boto tu huta muna on. Hehehe.. selamat menempuh hidup baru” ninna si Binsar dijalang tangan ni si Vannesa namansai lambok saltak dope kutekna.

“Mauliate.” Disima di papuas si Vannesa mangahoal si Binsar. Mangangguk di abarani si Binsar.

“Bereng jolma. Sotung mandia annon” dihusiphon si Binsar. Ipe asa di palua si Vannesa panghaol nai.

“Selamat, ma dah..” menghel si Binsar manjalang.

“Rodo hape lae...!!! Mauliate ma dah” ninna rap menghel nasida. Nungga jolo bolus asa manghuling pariban ni si Vannesa.

Marfhoto keluarga majo di Gareja, sai i mulak ma tu jabu. Di alaman ma pasahat adat na gok, manjalo mangalehon na hombar tu adat.

“Dek, indian donganhu do. Dongkon jo tu imana unang pintor mulak da” didok si Vannesa songoni tu anggina asa di pasahat tu si Binsar.

Hatop do antong anggi ni si Vannesa i lao mandapothon jala songon dia di dok si Vannesa songoni di dok angginai.

“Ndang boi. Cutiku holan opat ari do” ninna si Binsar mangalusi.

Ulaon unjuk di antaran nabidang. Manjalo angka hata pasu pasu. Tung pe holan sahalak ni si Binsar mangelek jala mangido do imana tu protokol asa boi imana mandok hata selamat dohot pasahat kado nabinoanna.

“Donganna sian Manado do ahu. Lean majo tu ahu tingki tongkin Tulang holan saminit pe” ninna si Binsar mangelek.

Jolo martodo hatamajo protokol ni ulaon i dohot parsinabung. Soluk sahalak ama ama mandok “Ai tung lean hamu ma. Apala dao imana sian Manado”

“Eh tutu. Holan saminit pe” ninna sahalak nari.

Jadima. Dilean ma tingki tu si Binsar “Alai ndang boi ho jumolo da, jolo sai saejo angka silean ulos tohonan” ninna protokol i tu si Binsar.

“Olo, Tulang, Mauliate” ninna si Binasar mansai elek.

Sae dilean angka ulos tohonan rodi na ringkot di ulaon i. Denggan jala bage parjongjong ni protokol i mandok hatana

“Mauliate ma di Tuhan. Santabi di ulaon namarsangap namartuan on. Disi ala holong ni roha namarale ale. Adong do ro donganni boru nami on sian Manado.” Pintor humusor si Binsar sian hundulan na didapothon protokol i. “Hu pasahat ma tu langkam” disurdukhon protokol i mic tu si Binsar.

“Gabe ma tutu jala Horas” ninna si Binsar mamuhai hatana. Alai lalap do dipasuman songon na mangapus ilu, ndung dibereng si Vannesa tarilu. Diapus si Vannesa jo iluna.

“Holan ahu do utusan sian ale-ale ta na Adong di Manado. Dongan sa singkola dohot dongan sa parmeaman. Las ma roham itokku tungpe holan ahu naboi mangadopi ulaon ta on. Ndang alani losok ni roha manang alani holit. Jala tangkas do taboto sude ale-alenta parkarejo do ndang boi manigor dohot. Dibahen i adong dison dipatupa hami angka ale-alem songon tanda naparsidohot do hami marlasni roha. Songon dia pe na nilean nami on, unang ida itoku sian argana manang sian rumang. Lasma roham manjalo” dilean si Binsar kado nai. Tung pe holan imana manuhor dohot patupahon alai ditingki mangalean sian ale ale do di dok imana.

Songot situtu do rohani si Vannesa mambege hata “ITO” nanidok ni si Binsar. On dope dibege imanai saleleng nasida marsitandaan.  Maraburan ilu ni si Vannesa nungga sai diapus nian lalap do sai maraburan garida lam doras panetek nai sampe hohar make-up na.

🎶sadarion nama marhasotohan ho, Ito. Ima napililtimi saonari. Gabe laekki. Ingot mai Ito, diangka hata podaki. Burju ma ho tu laeki, nang dohot hula hula mi.. 🎶

Gabe marende si Binsar nungga siat mamiding naing ma mamolok. Nungga dilean tingki tu imana laos naing lomona. Diganti muse lirik ni endei. Sian “Amang gabe dibaen itokku” nungga sai digoit protokol i nian laos paula so dihilala si Binsar do lam di endehon endei. So jolo mangido imana kunci ni endei i tu parmusik hape laos malo do parmusik i boi diihuthon soarani si Binsar. Marjojor angka natorop ro manumbang, dipansolothon tu tanganni si Binsar.

🎶laos bahen itoma, laeki nang dohot simatuami. Torsongon holongmi tu natua tuamon na seleleng on🎶

manetek muse ma iluni si Binsar ndung mangendehon i. Manetek muse ilu sian simalolong ni Inong ni si Vannesa dohot angina. Gabe jojor do angka ari nasalpu nahea binolusna dohot si Vannesa. Songoni nang si Vannesa lam durus ilu nai marjullak jullak.

🎶anggiat ma ito, maranak marboru ho dohot laeki🎶

“Mauliate” ninna si Binsar dilap iluna. (Marudut - Bersambung)


Penulis : Erikson Simarmata





Tidak ada komentar:

Posting Komentar