Pelangi Batak " Sibalik Hunik " Episode Terakhir. - BURUH TODAY

Breaking

BURUH TODAY

www.buruhtoday.com


Post Top Ad

Sabtu, 16 Maret 2019

Pelangi Batak " Sibalik Hunik " Episode Terakhir.



“Ingkon manghudoni do halakan” soluk Ama-ama na dilambung ni si Binsar mandok hatana.

“Boha rade do roham??” disungkun Amanta I holan sae dinasida do hata i.

“Bah!! Borat mai?? Tu ise hudonanna” disungkun si Binsar.

“Tu ho dohot inong ni si Panisa”

“Annon ma hamu marhusip husip” pintor ninna Ompung Tolopan , ai sian nangkaning dimata babiathon do dompak si Binsar dohot Amanta i.

Digoit ama ama I si Binsar “ Nungga di pinsang hita” ninna huhut mengkel.

“Akh!!! Alani tulang doi”

Marlao ro jolma manjou Inong ni si Vannesa pir do tutu rohana, ise pe manggora pintor di jua do. Ompung Linggom ma lao manggora asa hatop hantus panghataion I.

Ndang be antong!!! Holan Ompung Linggom manggora ndang marngik Inong ni si Vannesa ndang barani manjua. Ai tingki dipaulak si Vannesa tu jabuna Ompug Linggom do nasai papos rohana.

“Dibaen hodo pir ni roham” ninna Ompung Linggom.
Ia dung sahat di alaman partungkoan i holan andung ni imana nama habegean. Diandungi boruna si Vannesa. Disiuk borunai di umma hurum na. Ndang tarorom ni si Vannesa be laos dohot si Vannesa mangangguk bobar.

Ditontahon ma songon dia uhum ni adat di huta I, songon paias goarni si Binsar.

“Unang pala sampe manghudoni, Amang” ninna si Binsar “Situan natorop nadison pe mamboto naso ahu manegai rumah tanggani si Vannesa nunnga tung mansai las rohanghu” diambai si Binsar hatana.

“Nauli mai” ninna Ompug Linggom.

“Ndang rade rohangku molo songoni. Na rumingkot di ahu nungga diboto angka dongan sahuta be naso borukkon marroha roha tu baoa na asing. Holan ido. Molo taringot manghudoni. Lokma rohana dihudoni unang ahu.” Dibungka inong ni Si vannesa mandarna laho mangalap ilu na naung maraburan sian nangkaning.

“Mauliate hu pasahat tu sude natua tua di huta on. Nungga di urupi hamu ahu pais goarhu. Jala nungga tangkas be taboto ise do namanimbil sian padan naung niojakhon ninasida di joroni Tuhan i. Mauliate ma.” Ima hata panimpuli sian si Binsar.

***

Jolo mangulon si Binsar di bagas ni si Vannesa, molo polisi  manjaga sidoli lapa lapa I dope. Alana ingkon borhat do nasida muse tu Jakarta. Di bagas ni si Vannesa di siuk ma si Binsar. Gok mauliate dipasahat Inong ni si Vannesa.

“Ingkon mulak do ahu tu Jakarta Nantulang” ninna si Binsar ala ditiopi Inong ni si Vannesa imana.

 “Sadari pe” dielek si Binsar.

“Ndang boi Nantulang. Mardalan dope proses hukum Hu baean. Ingkon disi do ahu” dipatorang si Binsar.

“Uhum aha dope I”

“Ndang sae di ahu uhum adat nantulang, ingkon dihurung doi asa jora” ninna si Binsar.

“Antong ho ma buti. Nungga hu tangkup manuk”

“Seat hamu ma Nantulang si Vannesa on donganmuna mangallang”

Sobarani majorat Inong ni baoa I ndung ditogu togu anakna I mardalan tu sirpang ni huta paima mobil tu Medan. Mandao do sude parhuta i. ala na tarida ima haroa pestol ni polisi i. umbahen mangirput sude. Laos holan ama ama dongan ni si Binsar ido na olo manjonok, ipe tahe holan di lambung ni si Binsar do hundul, ndang barani tong hundul dompak tu polisi i. 

***

Marsalpuan angka ari i. jumpa ari digantihon minggu ndungi bulan sahat ma tu taon.  Ias goarni si Binsar. Laos mulak tondi tu badan ima na nihilala ni si Vannesa.

Las rohana nungga diboto sahutana be naso imana siboan gara dirumah tanggana. Paribannai pe di hurung do ndang olo si Binsar manobus nadialuhon nai. Anggini si Vannesa pe ndang dia tardokna nungga sanga salpu hatana tu si Binsar. Sae proses uhum sian pamarenta manigor borhat do si Binsar tu Manado manguduti karejona.

Pintor jojor do dipatorang si Vannesa antong ndung sahat muse di Medan. Marria, marlasni roha dihilala si Vannesa hera nambaru ruar imana sian harangan longo longo mansai minar bohina.

“Naing tu Medan ahu” ditongos si Binsar SMS tu si Vannesa.

“Ro ma ho. Dison do nuaeng omak” dibalos si Vannesa.

“Tuhor tingkethu..ha..ha..ha..ha” menghel si Binsar mambalos.

”Naung tumpur do tokke i??” ninna si Vannesa mangalusi.

“ Na margait do ahu, akh!!! Hataku majo I” inna si Binsar.

Tingki ari jumat ma borhat si Binsar sian Manado. ari Sabtu pangkansi do parkarejo. Dirohana ari minngu borngin borhat imana sian Medan. Sae ma holan sitolu ari I unang be mambuat cuti.  Ndada na apala ringkot nian ulaon I holan na masihol do. Nungga sataon nasida ndang jumpa, baritape sahali sabulan do adong ndang ganup ari. Jala muse dipahombar si Vannesa do dirina diboto do naung mabalu imana, alani ido umbahen ndang apala diharingkothon barita sian si Binsar.

Sahat di Bandara nungga rade disi si Vannesa manomu, sian Bandara ima nasida martaxi tu jabu.

“Horas, Nantulang!!” ninna si Binsar, tasna lohot dope di ompa.

“Horas ma tutu, bah!!” ninna mangalusi

“Pahundul” dipajagar si Binsar hundul.

Anggini si Vannesa ndang olo ruar sian biluk. Mabiar mida si Binsar. Di ingot hata bura bura nanidok na tu si Binsar.

“Dek!!! Jalang bah” ninna si Vannesa naro sian dapur maniop mangkuk dohot tengko.

“Olo kaka” alai ndang morot angginai. Dilelei biarna imana.

“Sehat do Nantulang?” ninna si Binsar manungkun. “Nungga piga minggu di Medan on?”

“Sehat, saminggu dope ahu dison”

“Lam gompis do nantulang ateh. Poso idaon” ninna si Binsar.

Mangalompa anggini si Vannesa di dapur sian nangkaning digora laho manjalang ndada tarida hirdopna. Dipaula rongsot ulaon di dapur hape alani biarna do.

Mangan pe nasida borngin I unduk do torus anggi nai, ndang tolap mida si Binsar. Sae mangan pintor bongot muse tu biluk laos disinama ndang ruar.

"Jumolo ma ahu modom” ninna Inong ni si Vannesa didapothon boruna tu biluk.

Dijolo ima manghata hatai si Binsar dohot si Vannesa. Martaringot nasida tingki rap kulia, rap mardalani, rap tusan, tuson hatiha di Manado. Rap menghel martata.

“Paima jo asa manuhor sigaret jo ahu” ninna si Binsar, morot imana sian hundulan na lao manuhor sigaret.

Manghuling handphone ni Binsar na peak sian nangkaning di ginjang ni meja. Dibereng si Vannesa namartelefon i. “children” dipanotnoti si Vannesa handphone ndang ra di angkat manang di alusi. Manghuling muse. Dibaranihon si Vannesa mangalusi.

“papa sehat??” dibege si Vannesa songoni hata sian bariba telefon. Songgot rohana. “papa” hohom si Vannesa “ Naung ama ama do nuaeng si Binsar?” sungkot sungkun sungkun I dibagas rohana. Ndungkon I pintor sigop di pamate si Vannesa ndang diboto mangalusi. Gabe mandia I do rohana muse. Gabe gok sungkun sungkun.

Ndung pe sahat si Binsar di jabu manghuling muse handphone nai. Jolo dibereng si Binsar bohini si Vannesa ndungi morot dipadao sian lambung ni si Vannesa ndung holip disipe di alusi. Hape laos mangintip do si Vannesa manangihon nasida manghatai.

“Sehat, nak”

“Iya, papa segera pulang. Udah makan nak?"

“Ompung sehat?”

“Ia, ia nak, akan kita belikan boneka yang sangat besar. Jangan nakal. Turut sama ompung yah, nak”

“Toho ama ama” ninna si Vannesa nenget, morot sian inganan nai unang tanda namanangi-nangi imana mulak muse tu hundulanna na parjolo.

“Sahat tu dia nangkaning Pargaiton ta i?” ninna si Binsar di kantungi handphone na.

“Ise na martelefon I” gabe songoni do alus ni si Vannesa.

“Oh, pahompu ni natua tua i. mahua haroa?” ninna si Binsar mangalusi.

“Boasa pola doa ho laho mangalusi? Na adong do na sala?”

“Daong!!! Unang hatai be i!!!” nungga muba dibereng si Binsar bohini si Vannesa.

“Unang margabus ho. Hubege nangkaning. Jala ahu do parjolo mangalusi telefon I” jujur si Vannesa na imana nangkaning mangalusi telefon i.

“Oh. Aha di dok. Antong nungga di boto ho be”ninna si Binsar mangalusi.

“Sehat papa??” holan ido didok ninna si Vannesa. "Ndang boi hu alusi gabe hu pamate telefon i"

“Oh. Ido Among na do ahu” ninna si Binsar.

“Boasa roho tuson molo naung adong do ianakkon mu? Ia tung I maharingkothon ingot inantam” ninna si Vannesa.

“Ringkot do I di ahu. Jala hu ingot do inantanku. Ndang alani nasida gabe laos so boi ahu jumpa dohot ho” ninna si Binsar.

“Ehe. Ima parmudu mudu, unang sai haringkothon be na asing. Nasida ma baen songon Labuan ingananmu paulak hosa loja”

“Ido. Toho hian doi. Jala ido sasintong na.”

“Berarti tingki kulia nungga marrumah tangga ho?”

“Nungga” jempek alus ni si Binsar “Mahua haroa? Sala?”

“Ndang sala. Boasa ndang di paboa ho tu ahu??”

“Ala soringkot I pabotohonon tu angka dongan. Nungga be akh!! Na asing ma tahatai” laos ninna si Binsar.

“Puluk roham, manggabusi ahu”

“Ndang hu gabusi ho. Hope so hea disungkun ho I”

“Paboa. Asa hu boto.”

“Ehe, nungga sae be ningon, sai didatdati. Ndang songon na dipingkiran mi ahu dah”

“Aha haroa dipingkiranhu”

“Dirimpu hodo ahu ama ama naso tarpinsang”

“Ido. Memang tohodo. Nungga ama ama ho alai sai ro dope ho tuson”

“Ehe, sura lomo rohangku. Datung loasonhu ho marhamulian. Baoa dia naso marlomoni roha mida ho? Au sandiripe marlomo ni roha do mida ho. Alai ala hu boto ma naung ama ama ahu, hu porso do holonghi tu ho, huparsoada ala ndang ringkot di ahu holong i. boru buha bajukkan do narumingkot di ahu”

“Jei, diboto inantam doho ro tuson?” nangkok soarani si Vannesa “Sotung ro anon toru toru tu ahu!!!”

“Diboto. Jala hu boan do” ninna si Binsar disandehon pamatang na tu karosi i. paet hata nai dihilala.

“Didia ma molo diboan ho??” ninna si Vannesa mansai tanda muruk nai.

“Dison” ditumbuk si Binsar andorana “Dison do imana maringanan, Dison” tangkas dibaen si Binsar.

Ndang diantusi si Vannesa dipatingkos muse manungkun diulahi.

“Dison. Dibagas rohangkon. Nungga leleng imana mian dibagas rohangkon. Holan pamatang na do naung gabe tano. Molo imana mian dope dibagas rohangkon” dipatorang si Binsar. Porhot haruar hata I sian pamanganna.

Unduk si Vannesa ndang diboto be mangalusi. Gabe iluna ma na ro mandungoi imana sian sihadangolan.

“Udah berapa lama” ninna si vannesa manungkun perek iluna.

“sejak masuk kuliah”

“Terus yg jaga anakmu siapa?”

“Omakhu, ompung na”

“Eh, sioto oto on tangis do tarhona” ninna si Binsar hape simalolong na nungga marilu di ingot songon dia parmonding ni ripe nai. “ akh!!! Nungga bei. Unang hatai bei” ninna si Binsar. 

Nungga tedek be parsorion ni si Binsar. Na lomo rohana mida si Vannesa. Mansai holong do. Alai ndang puluk rohana manggoit si Vannesa asa ripe na, ala tangkas do diboto ima ndang nalaho olo si Vannesa manjakhon ima molo ndung diboto naung songoni parniahapanna. Diporso, dijua si Binsar holong na dompak si Vannesa holan ala naung ama ama imana.

“Saleleng on. Songon dia doho”

“Mangolu.”

“Ehe” paet dihilala si Vannesa. Dokdok sitaonon na, dipados dohot sitaonon ni si Binsar.

“Sura ndang ama ama ahu, dohononhu do naholong rohangku tuho. Alaikan huboto diriku. Datung laos olo ho manjangkon holonghu molo ndung diboto ho ahu songon dia.hatihai. tingki anak boru dope ho” Ninna si Binsar.

Di ingot hodo hatanghu : ia molo hodo lao manandinghon. Ingkon ho ma mulak mandapothon. Unang be  borhat muse manundalhon. Unang tarpaima di panggullus ni alogo sampuran.

Diundukhon si Vannesa ai padompak dompak do nasida namanghatai I holan meja do pangholangina. “Alai, ndang holan sahali be alogo sampuran mangullus, laos so mulak ho. Hape hodo lao manandinghon au. Laos borhat ho muse manundalhon ahu. Boasa ndang topotonmu ahu tu inganan pamenteanki??”

Hehe si Vannesa didapothon si Binsar nahundul mangunsande dihaol momos.

“Ndang na so hu boto dalan mulak na maila do ahu diharotakon ni pamatanghu” momos dope dihaol si Binsar. Diingot haburjuonna, marsap ilu si Vannesa namandahop i.

“Ndang na rotak pamatangmu. Na maila doho mandulo rohangku padua halihon”

Sanga hohom tongkin ndung leleng nasida marsiberengan, soarani panangga na sai mangorongi songon na mangandung.

"Nungga salpu rimbus sian ari naung tabolus, boha...!!! rade do roham asa rap hita manomu sibalik hunik?" Ninna si Binsar manungkun, soarana mansai lambok.

"Ndang holan manomu sibalik hunik rade rohanghu, paima alogo sampuran pe ingkon rap do hita" dipasombu si Vannesa iluna marabur.

TAMAT.

Penulis : Erikson Simarmata. 

Tidak ada komentar:

Posting Komentar